Strukturproblemoj de la Komunista Movado

Theodor Bergamann naskiĝis en 1916, estis profesoro pri internacia kompara kampkultura politiko ĉe la universitato Hohenheim kaj vivas en Ŝtutgarto, Germanujo.

Li estas eble la lasta en 2017 ankoraŭ vivanta komunisto kiu rifuzis akcepti la stalinismigon de sia germana komunista partio (KPD). Ekskludite, li kun samsortanoj fondis la opozician komunistan partion (KPD-O). Dum sia tuta vivo li klopodis por analizi kaj korekti la erarojn en la komunista movado. En tiu ĉi libro li komparas la similajn evoluojn en Sovetio kaj la Popolrespubliko Ĉinujo kaj venas al la konkludo, ke la reformistoj de la komunista partio en Ĉinujo havis pli bonan ŝancon ol en Sovetio, ĉar en Ĉinujo transvivis spertaj kaj reformemaj komunistoj, dum en Sovetio ili estis preskaŭ ĉiuj eĉ korpe eliminitaj de la diversaj "purigoj" fare de Stalino. Laŭ la aŭtoro, Gorbaĉovo venis tro malfrue kaj estis preskaŭ tute izolita, kaj liaj novigaj klopodoj frakasiĝis en rigidiĝinta sistemo, dum la reformo en Ĉinujo estas ĝis nun sukcesa kaj esperiga por ke almenaŭ tie konstruiĝu la bazo de estonta socialismo.

Bergmann listigas la strukturproblemojn de la komunista movado kaj donas helpajn indikojn por ĉe la preparo de homoj kaj rimedoj por estonta nova revolucia situacio eviti la fatalajn erarojn de nia historio.